Данийл Хармс Өгүүллэгүүд 2

Харааны самуурал

Семён Семёнович нүдний шил зүүгээд нарс руу хартал нарсны мөчир дээр нэг эр суугаад түүн рүү нударга зангидаж байхыг үзэв. Семён Семёнович нүдний шилээ аваад нарс руу хартал тэнд хэн ч байсангүй. Семён Семёнович нүдний шилээ зүүгээд дахиад нарс руу харвал нарсны мөчир дээр нэг эр суугаад түүн рүү нударга зангидахыг үзэв. Семён Семёнович нүдний шилээ аваад дахиад хартал нарсан дээр хэн ч байсангүй. Семён Семёнович дахиад нүдний шилээ зүүгээд дахиад нарс руу харвал нарсны мөчир дээр нэг эр суугаад түүн рүү нударга зангидахыг үзлээ. Семён Семёнович энэ үзэгдэлд итгэхийг хүссэнгүй үүнийг харааны самуурал эндүүрэл гэж тооцов.

 

Данийл Хармс Өгүүллэгүүд

***

Кузнецов нэртэй нэгэн хүн аж төрж байжээ. Нэг удаа мухар сандал нь хэмхэрчээ. Тэр дэлгүүр орж модны цавуу авч сандлаа наахаар гэрээсээ гарч явав. Кузнецовыг баригдаж буй барилгын хажуугаар алхаж явтал толгой дээр нь тоосго унав. Кузнецов унангуутаа харайн босож ирээд л толгойгоо тэмтэрлээ. Кузнецовын толгой дээр том булдруу ургажээ. Тэр булдруугаа зааж

-Би, иргэн Кузнецов, гэрээсээ гараад дэлгүүр явж, юу… юу… Энэ чинь одоо юу вэ? Дэлгүүр яах гэж явснаа мартчихдаг байна шүү дээ гэв.

Энэ хооронд дээвэр дээрээс хоёрдахь тоосго унаж Кузнецовын гавал уруу дэлсээд авах нь тэр.

-Ёо ёо гэж Кузнецов орилоод толгойгоо барьж хоёрдахь булдруугаа тэмтэрлээ.

-Ийм юм л даа. Би, иргэн Кузнецов, гэрээсээ гараад явж байлаа… явж байлаа… Хаашаа явж байлаа? хаашаа явж байснаа мартчихжээ гэж ярив.

Тэгтэл Кузнецовын толгой дээр дахиад нэг тоосго уналаа. Толгой дээр нь гуравдахь булдруу бий болов.

-Ёо ёо гэж бархираад Кузнецов толгойгоо тэвэрч авав.

-Би иргэн, Кузнецов, гарч явсан…ирсэн…зоориноос гарч ирсэн. Үгүй. Ингэхэд би хаанаас гарч ирсэн юм бэ?

Д.Энхболдбаатар Шүлгүүд

Хөглөрөл дотроосоо сэтгэлээ эрж
Онгичил дотроо би түүртэнэ
Хөмсгөн дороосоо сарыг олоод
Онгорхой гэгээвчээр тэнгэр рүү шиднэ
Хөшиг ярж шөнийн омог сэвэлзэхэд
Ичгүүргүй харанхуй миний амрагийг таална
Хөнжлөө татах яруу тунгалаг эгшин
Өрөөгөөр нэл ялдам үнэр ханхлуулна