Рюноскэ Акутагава Ширэнгэнд

Модчин шүүхийн түшмэлийн байцаалтанд өчсөн ину

Тийм ээ би цогцсыг олсон. Өнөө өглөө би аанай л түлээ түүхээр ууланд гарсан. Гэтэл уулын бэлийн төгөл дотор хүүр хэвтэж байх юм. Яг хаана гэж үү? Ямасина хүрдэг замаас дөрөв таван тё /Японы уртын хэмжээ 109 метртэй тэнцэнэ/ хэртэй зайд байх. Тэр бол залуу шилмүүст модод, хулстай холилдон ургасан зэлүүд газар л даа.

Тэр хүүрэн дээр гандсан цэнхэр суйкан /гадуур хүрэм маягийн богино, хормойгүй кимоно/, нийслэлийнхний өмсдөг хуучирсан эбоси /японы язгууртнуудын өмсдөг байсан шовгор зөөлөн малгай/ малгай хэвтэж байлаа. Хүүр дээш хараад хэвтэж байсан л даа. Юу л даа, Яг цээжин дээр нь ганцхан шарх байсан.

Одоо би яана?

Би блог нээв. Зарим нэгний үгээр бол их л оройтож нээсэн гэлцэнэ. Бараг хоёр сар болж байх шиг… Гэхдээ энэ нэг их ач холбогдолгүй шахам… Өөрийн бичсэн бас англи орос хэлнээс орчуулсан юмнуудаа ганц нэг хүн уншвал яах бол гэж санаад блог нээсэн юм. Орчуулгууд бол ойлгомжтой. Хүмүүс унших хэрэгтэй байх… Харин миний бичсэн юмнууд… Хадууралгүй гол юмаа ярья.

Юкио Мишима хийгээд үхэл бас бусыг танилцуулах нь

Мишима Юкио (1925-1970) Тоокёогийн ойролцоо орших Итагай хуаранд 1970 оны 11-р сарын 25-нд самурайн ёсоор сеппуку (гэдсээ хүүлж үхэх ёс) хийж энэ ертөнцөөс одсон юм. Тэр энэ өдөр дөрвөн дагалдагсдийнхаа хамт хуарангийн даргын өрөөнд дайран орж генералыг барьцаанд аваад хуарангийн цэргүүдийн өмнө үг хэлж, Японы үндсэн хуулийг халж, Япон улсыг бүрэн зэвсэглэсэн армитай байхыг уриалжээ. Дэлхийн дайны дараа Япон улс армиа татан буулгаж, зөвхөн өөрийгөө хамгаалах хүчинтэй болсон бөгөөд эдүгээ хүртэл тэр хэвээр байгаа юм. Мишима үүнийг эсэргүүцсэн аж. Гэвч хэн ч түүний үгийг хүлээж аваагүй учир үзэл бодолдоо үнэнч болохоо баталж амиа хорлосон байна.

Д.Дашмөнх Сохор муурын тухай

(Туурь)

Бурханч лам Насанг их нямбай, үнэн хичээнгүй хувраг байсан гэж Их Хүрээний амтай болгон дурсацгаадаг билээ. Чойрын номонд нэвтэрч шалиагүй ч зурах урлах цаглашгүй их авьяастай төрсөн нь илэрхий байсан тул аяндаа Их Хүрээ даяар алдартай бурханч болсон юм. Түүний бүтээсэн бурхадын хөрөг, цутгамал, баримлууд энэ насанд байтугай хэдэн жарныг элээн олны мэлмий оюуныг баясгах идтэй гэдэгт эргэлзэх зүйлгүй. Насангийн бүтээсэн Хутагт Жавзандамбын унтлагын лавринд залаатай байдаг Ногоон Дарь Эхийн цутгамал өөрөө үеэлзэн бүжиж байгаа мэт байдаг гэж дэргэдийн сойвон ярихыг би сонссон билээ.

Харри Харрисон Харь гаригийн хүний үхлийн тарчлаан

Үргэлжлэл, Түрүүч нь архивт бий
-Тэднийг зүгээр л байлга. Битгий оролд. Үнэхээр шаардлагатай юм бол хууль, гүн ухаан, байгалийн шинжлэл, түүх гээд тэдний өмнө нь байдаг гэдгийг нь төсөөлдөг ч үгүй байсан тэр орчлон ертөнцтэйгөө тулгарахад хэрэг болохуйц зүйл заал даа. Харин нүгэл хилэнц, буруу бодол, хорсол, зүхэл, ял шийтгэл, хойд нас гэж зүйлсээр л толгойг нь битгий эргүүлээрэй. Ямар үр дагавар гарахыг…

-Та доромжлоод байна уу гээд шашин номлогчийн дуу нь чангаран өндийж ирэв. Түүний буурал толгой, аварга биет сансрын нисгэгчийн эрүүнд хүрэхтэй үгүйтэй байсан ч тэр итгэл үнэмшилээ хамгаалах зориг төгөлдөр ажээ.
Уур нь бадарсан Гаарт ч нүглээ наминчлагч аятай суугаад байхыг хүсэхгүй байлаа. Тэд ууртайгаар бие биенээ хялайн харцгаав.

-Харин чи л доромжлоод байна гэж Гаарт хашхираад,

- Хүн төрөлхтөнийг одоо хүртэл дарамталж байгаа үй түмэн үлгэр домгоос тун өчүүхэн ялгарах тэр хиймэл үлгэр чинь Вескерчүүдийн боловсорч байгаа оюуныг төөрөлдүүлэхээс өөр юм хийнэ гэж ямар гайхалтай амиа хоохойлогч санаж болдог байна. Тэд нар худлаа гэж зүйл байдгийг хэзээ ч сонсоогүй, зөвхөн үнэн гэж байдгийг л мэднэ. Тэднээс бусад оюун ухаан өөрөөр боддог, сэтгэдэг байж болно гэдгийг тэд одоохондоо ойлгох болоогүй байна. Хэрвээ үүнийг өөрчлөх … гэтэл хар лам үгийг нь таслав.

-Ноён Гаарт, би бурхны тааллаар өөрийн үүргээ биелүүлэхдээ л биелүүлнэ. Ертөнцийн Эзний үгийг тэдэнд хүргэж, сүнсийг нь аварч, хойд насанд нь диваажинд төрүүлэх үүргээсээ зайлсхийж хэрхэвч чадахгүй.